"Harbiy-vatanparvar"

Yoshlarni vatanparvarlik ruhida tarbiyalash, ularda Vatanga daxldorlik hissini uygʻotish, harbiy sohaga boʻlgan qiziqishlarini oshirish, shuningdek, ularni ijtimoiy qoʻllab-quvvatlash, iqtidori va isteʼdodini roʻyobga chiqarish hamda hayotda oʻz oʻrnini topishga koʻmaklashish maqsadida Termiz garnizonida joylashgan harbiy qism tomonidan shaharning 26-maktab oʻquvchilari uchun “Yoshlar milliy armiya nigohida” shiori ostida harbiy-vatanparvarlik festivali oʻtkazildi. Unda harbiy qism harbiy xizmatchilari, maktab oʻquvchi yoshlari, faxriylar hamda keng jamoatchilik vakillari ishtirok etdi.

Dastlab, maktabda tashkil etilgan tadbirda soʻz olganlar soʻnggi yillarda mudofaa tizimida olib borilayotgan ishlar xususida soʻz yuritdi. Bu kabi festivallar yoshlarni Vatanga muhabbat, harbiy kasbga boʻlgan qiziqishlarini yanada oshirishga xizmat qilishini alohida taʼkidlab oʻtishdi.

Shundan soʻng, tadbirning asosiy qismiga navbat berildi. Tadbir davomida harbiy orkestrning kuy-qoʻshiqlari, faxriy qorovulning hamda qoʻl jangi ustalarining koʻrgazmali chiqishlari yigʻilganlarga namoyish etildi.

Shuningdek, festival doirasida Oʻzbekiston Respublikasi mudofaasiga koʻmaklashuvchi “Vatanparvar” tashkiloti Surxondaryo viloyat kengashining sport texnikalari yoshlar eʼtiboriga havola qilindi.