Сурхондарёда Рамазон ҳайити катта шоду хуррамлик билан бошланди

Сурхондарёда Рамазон ҳайити катта шоду хуррамлик билан бошланди

Муборак Рамазон ҳайитининг биринчи куни Сурхондарё вилоятида шоду хуррамлик ва шукроналик кайфиятида бошланди. Эрта тонгда вилоятдаги 124 та жоме масжидларида ҳайит намози ўқилди. Унда 188 мингдан ортиқ намозхон саодатли кун ибодатини адо этди.

Термиз шаҳридаги Ҳаким Термизий номидаги жоме масжиди ҳам эрта тонгдан юртдошларимиз билан гавжум бўлди.

Ҳайит намози маърузасида маънавий қадриятларимиз юксалиши йўлида амалга оширилаётган саъй-ҳаракатлар, бугунги фаровон ҳаётимиз мазмун-моҳияти ҳақида сўз борди. Инсонларга меҳр кўрсатиш ҳамда яхшилик қилиш савоби ҳақида айтилди.

Рамазон ҳайити намозида юртдошларимиз шу кунларга етказганига шукрона айтиб, элимизга тинчлик-хотиржамлик, омонлик, қут-барака тилаб дуолар қилди.

Рамазон ҳайити амалларини адо этган воҳадошларимиз бир-бирларини байрам билан қутлашгач, яқинларини йўқлашга, беморлар ва муҳтожлар ҳолидан хабар олишга, уларга ҳадялар улашиш, хайру саховат каби эзгу амаллар бажаришга ошиқдилар.