Маҳалла фаоллари учун шароитлар яратилади

Маҳалла фаоллари учун шароитлар яратилади

Вилоят ҳокими Улуғбек Қосимов Термиз шаҳридаги “Дўстлик” маҳалласига ташриф буюриб, маҳалла биносини кўздан кечирди. Бу ерда ёшлар етакчиси ва хотин-қизлар фаоли учун битта хона ажратилганлиги, фаолларнинг ишлаши учун шароитлар яратилмаганлиги танқид қилинди.

Айни масала юзасидан Термиз шаҳар ҳокимлигида маҳалла фаоллари ва шаҳар масъуллари иштирокида муҳокама ўтказилди. Унда вилоят раҳбари Президентимиз белгилаб берганларидек барча ислоҳотлар маҳалладан бошланиши лозимлигини таъкидлади. Термиз шаҳридаги 37 та маҳалланинг 11 тасида хотин-қизлар фаоллари учун алоҳида хона ажратилмаганлиги, қолганлари ҳам олдиндан мавжуд, таъмирталаб хоналарда фаолият юритиб келаётганлиги танқид қилинди.

Шаҳар масъулларига барча маҳаллалардаги “бешлик” – маҳалла раиси, ҳоким ёрдамчиси, ёшлар етакчиси, хотин-қизлар фаоли ва профилактика инспекторлари учун алоҳида хоналар ажратиш, уларнинг фаолият юритишлари учун зарур шароит яратиш ҳамда замонавий компьютер жамланмалари билан таъминлаш бўйича топшириқлар берилди.

Шунингдек, ҳафтанинг ҳар жума кунлари биттадан туман (шаҳар)да хотин-қизлар фаоллари билан учрашиб, амалга оширилган ишлар, хотин-қизлар муаммолари ва йўл қўйилган камчиликлар бўйича муҳокамалар ўтказилиши белгилаб олинди.