15-май – “Халқаро оила куни”

15-май – “Халқаро оила куни” муносабати билан Термиз шаҳридаги Ёшлар марказида “Ибратли оила” кўкрак нишони ҳамда “Янги Ўзбекистоннинг ибратли оиласи” кўрик-танловининг вилоят босқичи ғолибларини тақдирлаш маросими бўлиб ўтди.

Тадбирда сўз олганлар мамлакатимизда оилаларни қўллаб-қувватлаш ва мустаҳкамлаш, улардаги ижтимоий-маънавий муҳит барқарорлигини таъминлаш, оиланинг жамиятдаги ўрни, роли ва нуфузини ошириш борасида кенг кўламли ишлар амалга оширилаётганлигини таъкидлади.

“Янги Ўзбекистоннинг ибратли оиласи” кўрик-танловида вилоятнинг 700 га яқин оиласи иштирок этди. 150 оила орасидан туман, шаҳар ғолиблари сараланиб, улардан 15 нафари вилоят босқичида иштирок этди.

Якуний натижаларга кўра ғолиб деб топилганлар диплом ва эсдалик совғалари билан тақдирланишди. Шунингдек, “Ибратли оила” кўкрак нишони ҳам ўз эгаларига тантанали топширилди.